Шрифт

Акафисты Праздникам

Акафист Воскресению Христову (иной)

Акафист Воскресению Христову
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1.

Возбра́нный Воево́до и Го́споди, ве́чныя сме́рти победи́телю, я́ко изба́влься от духо́внаго умерщвле́ния, похва́льная воспису́ю Ти́, возсозда́нный Тобо́ю, ра́б Тво́й. Ты́ же, я́ко име́яй побе́ду над сме́ртию, от сме́рти грехо́вныя свободи́ на́с, зову́щих:

Иису́се воскре́сший, воскреси́ ду́ши на́ша.

И́кос 1.

А́нгели воскресе́ние Твое́, Христе́ Спа́се, непреста́нно пою́т на небесе́х, и на́с на земли́ сподо́би чи́стым се́рдцем воспе́ти Тебе́ си́це:

Иису́се непостижи́мый, все́х ве́рных просвеща́яй, просвети́ и мя́ заблу́ждшаго.

Иису́се воскре́сший, все́х Собо́ю оживля́яй, оживи́ мя́ уме́ршаго грехми́.

Иису́се, на не́бо вознесы́йся и вознося́й на Тя́ наде́ющихся, совознеси́ и мя́ до́лу прекло́ннаго.

Иису́се, седя́й одесну́ю Отца́ и разделя́яй сла́ву с лю́бящими Тя́, не лиши́ мя́ сла́вы Твоея́.

Иису́се, хотя́й приити́ суди́ти живы́м и ме́ртвым, не осуди́ мя́ по дело́м мои́м, но сотвори́ со мно́ю по ми́лости Твое́й.

Иису́се воскре́сший, воскреси́ ду́ши на́ша.

Конда́к 2.

Ви́дя па́дших челове́ков, Го́споди, Ты́ вочелове́чився совоскреси́л еси́ все́х и, воскреси́в, дарова́л вся́ потре́бная ко спасе́нию: си́це и мене́ умерщвле́ннаго грехми́ оживи́, зову́ща: Аллилу́ия.

И́кос 2.

Ра́зум не постига́ет та́йны Боже́ственныя, ка́ко Исто́чник жи́зни воскреса́ет, умерщвля́я сме́рть? Сего́ ра́ди, то́чию се́рдцем испыту́юще ра́дость воскресе́ния и то́ю просвеща́еми, со гла́сом весе́лия духо́внаго взыва́ем Ти́ си́це:

Иису́се, входя́й две́рем заключе́нным, вни́ди в до́м души́ моея́.

Иису́се, сре́тивый ученики́ на пути́, сря́щи и мя́ на пути́ се́й жи́зни.

Иису́се, воспламени́вый сердца́ и́х Твои́ми словесы́, воспламени́ и мое́ хла́дное се́рдце.

Иису́се, да́вый Себе́ позна́ти в преломле́нии хле́ба, да́ждь ми́ позна́ти Тя́ в Боже́ственней Евхари́стии.

Иису́се, обеща́вый Ду́ха Свята́го ученико́м Твои́м, ниспосли́ и мне́ Сего́ Ду́ха Уте́шителя от Отца́.

Иису́се воскре́сший, воскреси́ ду́ши на́ша.

Конда́к 3.

Си́лою Боже́ственною воскреси́вый Ла́заря, воскреси́ и мене́ истле́вшаго страстьми́ и многоле́тно лежа́щаго во гро́бе нераска́яния, да возста́в по гла́су Твоему́, воспою́ спаса́емый: Аллилу́ия.

И́кос 3.

Име́яй вла́сть над сме́ртию, из а́да ду́ши воззва́л еси́, Иису́се. Воззови́ и мене́ из глубины́ грехо́вныя, да и а́з, очи́стив чу́вствия, блиста́ющу Ти́ во све́те непристу́пнем, ра́достно воспою́ побе́дную пе́снь та́ко:

Иису́се, сме́рти победи́телю, победи́ моя́ злы́я стра́сти.

Иису́се, жи́зни пода́телю, да́ждь ми́ жи́знь спаси́тельную.

Иису́се, исто́чниче ра́дости, возвесели́ се́рдце мое́ во и́стине Твое́й.

Иису́се, пятию́ хле́бы пя́ть ты́сящ насы́тивый, хле́бом небе́сным напита́й мя́.

Иису́се, наде́ждо па́дших, изми́ мя́ из ро́ва зо́л мои́х.

Иису́се воскре́сший, воскреси́ ду́ши на́ша.

Кондак 4

Бу́ря страсте́й смуща́ет и потопля́ет мя́, но молю́ Тя́ Иису́се, я́ко Петру́, простри́ ми́ ру́ку по́мощи и, си́лою воскресе́ния Твоего́ воздви́гнув мя́, научи́ воспева́ти: Аллилу́ия.

И́кос 4.

Слы́шаще ра́достную ве́сть воскресе́ния Твоего́, Иису́се, небеса́ досто́йно веселя́тся, земля́ же ра́дуется; и мы́ пра́зднующе ве́чное весе́лие, дерза́ем взыва́ти Тебе́ си́це:

Иису́се, седя́й во све́те непристу́пнем, бу́ди досту́пен все́м по милосе́рдию Твоему́.

Иису́се, любя́й созда́ния Твоя́, не забу́ди и мене́ после́дняго.

Иису́се, влеки́й к Себе́ сердца́, смягчи́ и мое́ окая́нное се́рдце.

Иису́се, вся́ блага́я проше́ния исполня́яй, испо́лни и мое́ проше́ние, во е́же па́че всего́ люби́ти Тя́.

Иису́се, вся́ку ка́плю сле́зную прие́мляй, не отри́ни и мои́х моле́нии.

Иису́се воскре́сший, воскреси́ ду́ши на́ша.

Конда́к 5.

Богоприя́тная жи́знь источа́ется от Тебе́, о Иису́се Сы́не Бо́га жива́го! Сего́ ра́ди молю́ Тя́, да не погуби́т мя́ человекоуби́йца и да не загради́т уста́ моя́, вопию́щая Тебе́: Аллилу́ия.

И́кос 5.

Ви́девше ду́хом воскре́сшаго Го́спода, прииди́те, пи́во пие́м но́вое, не от ка́мене исте́кшее, но от исто́чника нетле́ннаго и живоно́снаго гро́ба Спаси́теля, и́мже безпло́дную зе́млю ду́ш на́ших одожди́в, научи́ все́х пе́ти Ему́ си́це:

Иису́се, напая́яй на́с Свое́ю Кро́вию, да́руй мне́ неоску́дно приима́ти пречестну́ю Кро́вь сию́.

Иису́се, ниспосыла́яй до́ждь на пра́ведныя и гре́шныя, ороси́ и мя́ к плодоноше́нию духо́вному.

Иису́се, не возгнуша́выйся гре́шницы пока́явшияся, да́ждь и мне́ но́зе Твои́ омы́ти слеза́ми благодаре́ния.

Иису́се, реки́й Фоме́: «блаже́ни не ви́девшии, но ве́ровавшии», да́ждь ми́ ве́ру нелицеме́рную.

Иису́се, реки́й: «ищи́те и обря́щете», да́руй ми́ обрести́ Тя́ еди́наго на потре́бу.

Иису́се воскре́сший, воскреси́ ду́ши на́ша.

Конда́к 6.

Пропове́дуяй в ду́се неумолка́ющаго ра́дования Твое́ живоно́сное воскресе́ние, Иису́се Бо́же мо́й, да бу́ду и а́з гре́шный прича́стник сего́ воскресе́ния, поя́ Тебе́ непреста́нно в го́рнем Иерусали́ме: Аллилу́ия.

И́кос 6.

Возсия́вый всему́ ми́ру воскресе́нием Свои́м Госпо́дь Иису́с Христо́с, ны́не вся́ исполня́ет све́та, не́бо же и зе́млю и преиспо́дняя; да пра́зднует у́бо вся́ тва́рь Христо́во воста́ние, в не́мже утвержда́еми вопие́м си́це:

Иису́се, вся́ исполня́яй све́том Твои́м, просвети́ и мои́ омраче́нныя о́чи.

Иису́се, не́бо и зе́млю сочета́вый, возведи́ мя́ от земли́ на не́бо.

Иису́се, снизше́дый све́том Божества́ в преиспо́дняя, сни́ди в преиспо́днюю души́ моея́.

Иису́се, изведы́й из темни́ц а́довых ожида́вшия Тя́ ду́ши, изведи́ и мя́ гре́шнаго из мра́ка уны́ния, я́ко живо́т мо́й а́ду прибли́жися.

Иису́се, все́м простира́яй пречи́стеи ру́це Твои́, объими́ и мя́ окая́ннаго.

Иису́се воскре́сший, воскреси́ ду́ши на́ша.

Кондак 7

Хотя́й откры́ти си́лу Божества́ Своего́, Госпо́дь покрыва́ется печа́тию Каиа́фы, да не нару́шив о́ныя пред стрегу́щими, победоно́сно воста́нет и научи́т пе́ти: Аллилу́ия.

И́кос 7.

Ди́вно и непости́жно е́сть, ка́ко вчера́ спогребы́йся Тебе́, Христе́, дне́сь совостаю́ ду́хом, Тебе́ воскре́сшему, и воспева́ю та́ко:

Иису́се воскре́сший, все́м ту́не жи́знь подава́яй, окрили́ у́м мо́й, да Тебе́ после́дствует.

Иису́се, освяти́вый зе́млю Твои́ми стопа́ми, освяти́ мы́сль мою́, к Тебе́ вознося́щуюся.

Иису́се, не возбрани́вый начерта́ти пречи́стый о́браз Тво́й, да́ждь и мне́ име́ти вы́ну в души́ мое́й о́браз Твоего́ воскресе́ния.

Иису́се, прия́вый две́ ле́пте вдови́цы, приими́ от мене́ пе́снь сию́.

Иису́се, не осуди́вый блудни́цы, но на пу́ть и́стины наста́вивый ю́, не осуди́ и мои́х нечи́стых у́ст, в песнопе́нии Тя́ лобыза́ющих.

Иису́се воскре́сший, воскреси́ ду́ши на́ша.

Конда́к 8.

Стра́нно Бо́га вочелове́чшася и воскре́сша мы́сленно ви́дяще, вся́кое жите́йское отложи́м попече́ние, я́ко да Царя́ все́х подъи́мем и воспое́м Ему́: Аллилу́ия.

И́кос 8.

Ве́сь бы́л еси́ любо́вь к па́дшим челове́ком, о Иису́се, и поста́вил еси́ на боже́ственней стра́жи богоглаго́ливаго Авваку́ма, да пока́жет светоно́сна а́нгела, я́сно глаго́люща о воскресе́нии Твое́м. Те́мже и мы́ зове́м Тебе́ си́це:

Иису́се, стрего́мый во́инами, посли́ па́ки а́нгела храни́теля на стра́жу души́ моея́, его́же а́з отгоня́ю грехи́ мои́ми.

Иису́се, ослепи́вый о́чи стрегу́щим Тя́ блиста́нием Божества́, отврати́ о́чи мои́ от суеты́ и просвети́ к позна́нию и́стины.

Иису́се, вопроша́вый апо́стола Петра́, «лю́биши ли Мя́?», да́ждь мне́ име́ти о́браз любве́ его́.

Иису́се, прости́вый тому́ апо́столу отрече́ние, прости́ и мне́ ежеча́сныя отрече́ния от повеле́ний Твои́х.

Иису́се, да́вый вла́сть вяза́ти и реши́ти, разреши́ мя́ от непра́вд мои́х.

Иису́се воскре́сший, воскреси́ ду́ши на́ша.

Кондак 9

Все́ естество́ челове́ческое Тобо́ю восприя́тое просла́вися воскресе́нием Твои́м, Иису́се, и сего́ ра́ди да́руеши телесе́м нетле́ние. Те́мже мы́, ви́дяще сие́ зна́мение в оста́нцех святы́х, вопие́м со умиле́нием: Аллилу́ия.

И́кос 9.

Вети́и богоглаго́ливии у́тренюют ду́хом, срета́я Тя́ исходя́ща из гро́ба, и вме́сто ми́ра прино́сят Ти́ пе́снь я́ко Со́лнцу пра́вды и Влады́це, с ни́ми же на́ша моли́твы приими́ сицевы́я:

Иису́се, прие́мый ми́ро на Тя́ излия́нное, приими́ и мно́ю излия́нная славосло́вия.

Иису́се, Со́лнце и́стины, просвети́ ду́шу мою́.

Иису́се, ры́бари соде́лавый ловцы́ челове́ков, улови́ и мою́ злу́ю во́лю в Твое́ послуша́ние.

Иису́се, из Са́вла соде́лавый первоверхо́внаго апо́стола, вразуми́ и мя́ заблужда́ющаго.

Иису́се, моли́твами апо́стола сего́ и все́х святы́х Твои́х, пощади́ мя́ гре́шнаго.

Иису́се воскре́сший, воскреси́ ду́ши на́ша.

Конда́к 10.

Спасти́ хотя́й ро́д челове́ческий Иису́се, снизше́л еси́ на зе́млю и Бо́г сы́й восприя́л еси́ не́мощи на́ша, да и в ни́х яви́тся си́ла Твоя́, подвиза́ющая пе́ти: Аллилу́ия.

И́кос 10.

Царю́ воскре́сший, Иису́се Христе́, Спаси́телю на́ш! Ты́, снизше́дый в преиспо́дняя земли́ и сокруши́вый вереи́ ве́чныя, содержа́щия свя́занныя ду́ши, свободи́ и мене́ от у́з греха́, взыва́юща Тебе́ си́це:

Иису́се, вручи́вый возлю́бленнаго ученика́ Ма́тери Твое́й, вручи́ и мя́ спаси́тельному Ея́ смотре́нию.

Иису́се, страда́ния Ма́тере Твоея́ обрати́вый в ра́дость, да́ждь и мне́ окая́нному терпели́во понести́ кре́ст мо́й.

Иису́се, да́вый ми́рови засту́пницу Ма́терь Твою́, да́ждь и мне́ гре́шному бы́ти под кро́вом Ея́.

Иису́се, младе́нцем невозбрани́вый прикаса́тися к Тебе́, да́руй мне́ и́х незло́бие.

Иису́се, реки́й блудни́це: «иди́, и отсе́ле не согреша́й», да́ждь ми́ ктому́ не прогневля́ти Тя́.

Иису́се воскре́сший, воскреси́ ду́ши на́ша.

Конда́к 11.

Пе́ние умиле́нное о воскресе́нии Твое́м да́руй мне́ принести́ Тебе́, о Спаси́телю мо́й! И в не́м да прии́мет душа́ моя́ еле́й исцеле́ния от душевре́дных мечта́ний, и да пое́т вы́ну Тебе́: Аллилу́ия.

И́кос 11.

Светоприи́мно от воскресе́ния Твоего́ восприя́вше лучи́ благода́ти, и чрез ни́х я́ко в зерца́ле ви́дяще духо́вно Твое́ живоно́сное воста́ние, поклана́емся Кресту́ Твоему́ Честно́му, и Свято́е Воскресе́ние Твое́ пое́м и сла́вим си́це:

Иису́се, преклони́вый небеса́, приими́ поклоне́ние на́ше благоутро́бно.

Иису́се, усну́вый пло́тию я́ко ме́ртв, умертви́ на́ша плотски́я по́хоти.

Иису́се, всего́ Себе́ да́вый на спасе́ние челове́ков, да́ждь и мне́ всеце́ло преда́тися Тебе́.

Иису́се, возше́дый на небеса́ угото́вати ме́сто лю́бящим Тя́, всели́ и мя́ во оби́тели Твоя́.

Иису́се, седы́й одесну́ю Отца́, десны́м овца́м сопричти́ мя́.

Иису́се воскре́сший, воскреси́ ду́ши на́ша.

Конда́к 12.

Благода́ть да́ждь и мне́, все́х возлюби́вый Иису́се, и приими́ мое́ моле́ние я́ко да́нь приноси́мую Тебе́, и отжени́ от души́ моея́ вся́ лука́вая помышле́ния, да неосужде́нно воспою́ Тебе́: Аллилу́ия.

И́кос 12.

Пою́ще Твое́ всесла́вное воскресе́ние, велича́ем Тя́, о Иису́се Христе́ Бо́же на́ш! И ве́руем, я́ко да́руеши все́м живо́т ве́чный. Того́ ра́ди в се́й нарече́нный и святы́й де́нь, я́ко бра́тия дру́г дру́га объи́мем, ненави́дящим на́с прости́м вся́ воскресе́нием, и еди́ными усты́ и еди́нем се́рдцем возопии́м Тебе́ та́ко:

Иису́се, благословля́яй благословля́ющия Тя́, благослови́ и ны́не поси́льный тру́д мо́й.

Иису́се, освяща́яй на Тя́ упова́ющия, освяти́ жела́ния и наме́рения моя́.

Иису́се, обеща́вый бы́ти с ве́рными до сконча́ния ве́ка, пребу́ди неотлу́чно и со мно́ю гре́шным.

Иису́се, Сло́во Ипоста́си О́тчей, очи́сти недосто́йное мое́ сло́во к Твоему́ песнопе́нию.

Иису́се, Па́сха спаси́тельная, от сме́рти к жи́зни приводя́щая, всели́ мя́ в черто́г Тво́й, просвети́в одея́ние души́ моея́.

Иису́се воскре́сший, воскреси́ ду́ши на́ша.

Конда́к 13.

О, Иису́се Христе́, сме́ртию сме́рть попра́вый и су́щим во гробе́х живо́т дарова́вый! Приими́ в воню́ благоуха́ния духо́внаго сие́ ма́лое моле́ние на́ше и су́щим на́м во гробе́х нераде́ния да́руй живо́т ве́чный, да пое́м Тебе́. Аллилу́ия.

Этот конда́к читается трижды, затем и́кос 1-й и конда́к 1-й.

Моли́тва ко Го́споду Иису́су воскре́сшему.

Сла́ва Тебе́, Го́споди Иису́се Христе́, Бо́же мо́й, я́ко па́ки сподо́бил мя́ еси́ недосто́йнаго, преше́дши по́прище свята́го поста́, поклони́тися Боже́ственным Страсте́м Твои́м и ви́дети всера́достный де́нь пресла́внаго из гро́ба Воскресе́ния Твоего́, в о́ньже свободи́л еси́ су́щия во а́де от ве́к свя́занныя ду́ши пра́ведных. Тоя́ Боже́ственныя свобо́ды ду́ха и пло́ти, дража́йший Спаси́телю мо́й, и а́з жела́ю, да разреши́ши мя́, свя́зана су́ща мно́гими грехи́, и да сотвори́ши возсия́ти живоно́сному све́ту Воскресе́ния Твоего́ во мра́чней души́ мое́й. Ви́жду бо безчи́сленныя щедро́ты и неизрече́нное человеколю́бие Твое́, я́ко не то́чию от небытия́ в бытие́ мя́ приве́л еси́, и о́браза Твоего́ подо́бием украси́в, всея́ до́льней тва́ри влады́ку поста́вил мя́ еси́, но и посе́м па́дша с высоты́ и врагу́ порабо́тившася, не оста́вил еси́, но, искупи́в мя́ безце́нною Кро́вию Твое́ю, благода́тию креще́ния снабди́л мя́ еси́, да востеку́ на пе́рвое достоя́ние. А́з же, окая́нный, запя́т бы́в умо́м плотски́м, обрати́хся вспя́ть и па́ки ра́б сотвори́хся греха́ и страсте́й, доне́леже еди́н по еди́ному погуби́х все́ да́ры благода́ти Твоея́. И ны́не у́бо, что́ сотворю́, не ве́м; оба́че помяну́в глаго́лы пречи́стых у́ст Твои́х, я́ко не прише́л еси́ призва́ти пра́ведники, но гре́шники в покая́ние, и а́з, я́ко еди́н от си́х, с ве́рою и смире́нием прихожду́ к живоно́сному гро́бу Твоему́, не арома́ты и воню́ ми́ра нося́й, (на́г бо е́смь и пу́ст благи́х де́л,) но па́че наде́жду имы́й обрести́ в не́м проще́ние греха́м мои́м и обновле́ние нечи́стому житию́ моему́. При́зри у́бо на мя́, ка́ющася и служи́ти Тебе́ хотя́ща, и не отри́ни от благода́ти Воскресе́ния Твоего́! Живоно́сною сме́ртию Твое́ю и погребе́нием умертви́ моя́ лю́тыя стра́сти, да, я́ко ме́ртв и погребе́н, живу́ в ми́ре се́м. Пресла́вным воста́нием Твои́м воздви́гни мою́ ду́шу, умерщвле́нную грехми́, и оживи́ со́весть, ея́же ничто́же в ми́ре ну́жнейши е́сть. Вознесе́нием Твои́м отто́ргни мя́ от су́етных и душетле́нных бла́г земны́х, и сотвори́ мя́ го́рняя му́дрствовати, я́ко да не ктому́ себе́ живя́ и угожда́я, но Тебе́, Го́споду и Бо́гу моему́, служа́ и рабо́тая, я́коже сподо́бихся поклони́тися Воскресе́нию Твоему́ на земли́, та́ко сподо́блен бу́ду ви́дети Тебе́, дража́йшаго Искупи́теля моего́, и на небеси́, за прия́тие сме́рти кре́стныя сла́вою и че́стию венча́нна, и ста́в одесну́ю вели́чествия Твоего́, со арха́нгелы и а́нгелы, и со все́ми искупле́нными Тобо́ю бра́тиями мои́ми, во ве́ки веко́в пою́ Тебе́: Аллилу́ия! Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ и помилуй мя, гре́шнаго, яко Благ и Человеколюбец.

Акафист Воскресению Христову